Die sinn awwer legga!

Des ging uns 9 JUFA-Oldies doch nunna wie Eel. Als ma uns am 18.06.05 im Oikaafszentrum in de Pingschtweed getroffe hawwe, um fer die JUFA ä paar Waffle zu verkaafe un iwwer die Situation vun de JUFA zu informiere hot kenna vun uns gedacht, dass des so en Erfolg werd.

Innerhalb vun grad e mol 2 Schtund hawwe die Pingschtweedler Waffle aus 2 Rieseschissle vertilgt. Mer hatte uns direkt vor de Schaukäschte uffgebaut, damit ma ach schee gsehe wern unn so wars ach. Viele vun de Leit, die vorbeigonge sinn hawwe erschtemol aghalte weil se sich uff unsere Schtellwänd mit Zeitungsartikl unn alte JUFA-Bilder wieddererkannt hawwe.

S war en Rieseschpaß! Mer misse jetzt echt e mol ä riesegroßes Donkschee an die Pingschtweedler sache!! So herzlische und gut gelaunte Leit wie die, die ma do morgens ogequatscht hawwe, trifft ma doch selte. Sogar die Männa, die ma beim Frieschoppe unnerbroche hawwe, hawwe gern unn bereitwillisch ihr Unnerschrift fer die JUFA abgewwe. Alles in Allem hamma 306 neie Unnerschrifte fer die JUFA gsammelt unn fascht 60 Euro oigenumme. Also enn volle Erfolg!

Nur een kleene bittere Troppe gibt’s in der ganze Sach dann doch. In der Nacht vum Samstach uff de Sunntach hot jemand uff de JUFA eigebroche unn hot unner annerem des Schpendepferdsche mitgehe losse, in dem ma zusätzlisch immerhin ach nochemol fascht 80 Euro gsammelt hatte. Awwer dodevunn losse mir uns nett unnerkriege! Mir mache trotzdem weiter unn mer wisse, dass ma dodebei uff die Unnerschtitzung vunn unsrer Pingschtweed zähle kenne.